Problematikat për të drejtën e përfitimit të KMCAP (të njohur si Kempi) për fëmijët me aftësi të kufizuara, veçanërisht në vitet e fundit edhe me rritjen e rasteve nuk kanë munguar në vendin tonë. Shpeshherë në edicionet informative, por edhe në emisionet investigative të ndryshme kemi hasur raste të prindërve që kanë denoncuar hapur vështirësitë e burokracitë me të cilat përballen. Për shembull në rastet kur dalin përpara komisionit, por edhe me pas në përfitimin e KMCAP që ju takon me ligj. Akoma në vendin tonë nuk ka politika të qarta të cilat mund të integrojnë në shoqëri dhe në jetë fëmijët me problematika të tilla. Duke marrë shkas nga problematika të tilla e më konkretisht ajo e përfitimit të KMCAP, Drejtoresha e Fondacionit “Down Sindrome Albania” (DSA) Emanuela Zaimi, nëpërmjet një statusi në Facebook ka kërkuar mbështetjen e medias për dy raste konkrete, të dy fëmijëve që janë diagnostikuar me Sindromën Down dhe nuk kanë përfituar për vite të tëra këtë mbështetje financiare që i është përcaktuar vetë ligji shqiptar.
Si më poshtë denoncimi i saj:
“Rasti i fundit (dhe jo i vetmi) i papërgjegjeshmërisë të sistemit në të cilin jetojmë, është rasti i një fëmije nga Shkodra me inicialet E.M që nuk ka përfituar akoma pagesën e aftësisë së kufizuar që i takon me ligj. E.M. është një djalë 5 vjeç me sindromën Down, por i diagnostikuar dhe me një sëmundje të përgjithshme të zorrës së trashë që në lindje. Kur fëmija ka dale në KMCAP të vlerësohet, mjekët e një spitali në Shkodër, e kanë nxjerrë me fletëthirrje vetëm për sëmundje të përgjithshme pa e shënuar në asnjë vend që djali ka Sindromën Down. Kjo ka bërë që fëmija të humbë të drejtën për të pasur këtë pagesë pasi është vlerësuar me një sëmundje të përgjithshme pavarësisht se është vlerësuar para një komisioni “ekspertësh”. Tani çështja ka ardhur në Tiranë për t’i gjetur një zgjidhje (aplikimi ështe bërë që në shtator dhe akoma s’kishte marrë një përgjigje). Pasi DSA shoqëroi prindërit dhe fëmijën tek Shërbimi Social në Tiranë për të kuptuar çfarë po ndodh, mësuam që babai s’ishte njoftuar që ka nevojë për një fletëthirrje të re ose analizë kariotipi (350 euro) për të vërtetuar që djali i tij ka Sindromën Down dhe rrezikonte që ky ankim të kalonte pa zgjidhur asgjë. Tani si zgjidhje e vetme dhe më e shpejtë mbetet bërja e analizës së kariotipit (e mbulon DSA) dhe të paraqitet me djalin për një vlerësim të dytë. Urojmë që ky rast të gjejë zgjidhje, ndërkohë që ne do të kërkojmë dhe për instrumenta ligjorë për “dëmshpërblim financiar” të rastit, pasi fëmijës i është mohuar një e drejtë prej paaftesisë dhe mungesës së informacionit të këtij sistemi “ekspertësh” e “mjekësh” që kemi. Ju rikujtoj që dhe Irma Nika, vajza piktore me SD që ju e njihni, nuk ka marrë për 17 vite rresht pagesën që i takon, pasi askush nuk i kishte vënë në dijeni prindërit e saj për ekzistencën e kësaj të drejte. Fale informimit të DSA Irma tashmë e merr pagesen që i takon. Pyetja është: kush do ta dëmshpërblejë Irmën dhe familjen për paratë që si ka marrë për 17 vjet rresht? Shumë raste të tjera paraqiten në fondacionin tonë, për asistencë sepse ju mohohet e drejta për të përfituar atë çfarë ju takon!! Ndërkohë në 2016 DSA ka rimbursuar 10 raste të analizës kariotip për familjet në nevojë!”
Redaksia e Revistës Who, do të lobojë e mbështesë gjithmonë të gjitha rastet e tilla problematike, specifikisht të fëmijëve me nevoja të veçanta, me dëshirën e mirë që fjala jonë të shkojë në instancat përkatëse e problemet e tyre të marrin zgjidhje./ revistawho.com
