SOLIDARITET BRENDA PS-së/ Sëmuret Bashkim Fino, qeveria i mbulon shpenzimet për kurim

Deputeti i Partisë Socialiste Bashkim Fino ka shfaqur probleme shëndetësore, por ende nuk dihet konkretisht nga se vuan politikani shqiptar. Mediat vendase raportojnë sot se një pjesë të shpenzimeve për kurim do të mbulohen nga qeveria. Vendimi është marrë nga Kryeministri Edi Rama me propozim të Ministrit të Shëndetësisë, Ilir Beqaj. Në vendimin e qeverisë thuhet se është akorduar fondi prej 560 000 lekë që do të përballohet nga Fondi i Sigurimit të Detyrueshëm të Kujdesit Shëndetësor. “Me propozimin e ministrit të Shëndetësisë, Këshilli i Ministrave vendosi: 1. Mbulimin e pjesshëm të shpenzimeve të mjekimit të z. Bashkim Fino, në masën 560 000 (pesëqind e gjashtëdhjetë mijë) lekë. 2. Ky fond të përballohet nga Fondi i Sigurimit të Detyrueshëm të Kujdesit Shëndetësor. 3. Pagesa të bëhet me paraqitjen e faturave origjinale të institucionit të kurimit. 4. Ngarkohen Ministria e Shëndetësisë dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi”, shënohet në vendimin e qeverisë.