Këngëtarja e njohur Soni Malaj ka ngritur një shqetësim të madh në industrinë e muzikës shqiptare, duke pohuar se numri i artistëve që performojnë live është jashtëzakonisht i vogël. Në një deklaratë të fortë, ajo theksoi se vetëm tre këngëtarë janë të aftë të dalin në skenë pa përdorur playback.
“Kur vjen fjala për të bërë një koncert live, në të gjithë industrinë jemi tre veta. Nëse në Shqipëri do bëhen evente të mëdha dhe duhet të dalim në sheshin Skënderbej para 20 mijë vetave live, jam vetëm unë, Aurela Gaçe, Alban Skënderaj. Çdo gjë minimizohet, nga qindra këngëtarë që janë, bie numri.”
Sipas saj, konkurrenca ka sjellë më shumë profesionalizëm në skenë, por njëkohësisht edhe një konsum të shpejtë të muzikës.
“E mira është që ka shumë informacion tani, kush do që të punojë gjërat janë shumë më profesionale. Konkurrenca ka shtuar kërkesën e llogarisë tek secili, duke filluar nga imazhi e paraqitjet në skenë. E keqja është që është konsumi i shpejtë.”
Soni Malaj gjithashtu ka ngritur shqetësimin për përdorimin e gjerë të playback-ut nëpër klube, duke pohuar se kjo praktikë ka ndikuar në zvogëlimin e numrit të këngëtarëve që këndojnë live.
“Playback-u vazhdon fuqishëm, nëpër clube edhe kur duam të këndojmë live, nuk është teknika e duhur. Duke qenë se shumica e këngëtarëve këndojnë playback, është një pakicë shumë e vogël që kërkojnë të dalin live, por pronarët e clubeve thonë që jo sepse rrezikohen të tjerët. Audienca e kupton shumë mirë këtë. Ndoshta edhe këngëtarët duan të dalin live, por nuk janë kushtet, sepse gjëja është shumë e shpejtë.”
