Në një video të thjeshtë, por thellësisht simbolike, Antigona Ramosaj, nëna e artistes Beatrix Ramosaj, u pa duke i rënë gongut, një gjest i njohur ndërkombëtarisht si shenjë e përfundimit të një etape të vështirë shëndetësore. Me fjalët “Sot i rashë gongut me një zemër që rreh plot mirënjohje”, ajo ndau me ndjekësit jo vetëm një lajm personal, por një triumf mbi frikën, dhimbjen dhe pasigurinë.
“Nuk është vetëm fundi i një trajtimi, është dëshmi e forcës, besimit dhe durimit,” shkroi ajo, duke falënderuar Zotin, mjekët, infermierët dhe familjen për mbështetjen e pakushtëzuar. Mesazhi i saj u kthye menjëherë në një thirrje shprese për shumë të tjerë që përballen me beteja të ngjashme. “Me zemër mirënjohëse falënderoj çdo mjek, çdo infermiere, familjen time dhe të gjithë ju që më mbajtët me lutje dhe dashuri,” theksoi ajo, duke e kthyer momentin personal në një akt kolektiv mirënjohjeje.
Megjithatë, me besim, Antigona shtoi se rrugëtimi i saj “vazhdon ende, me kontrolle dhe hapa të tjerë”, por se sot zgjedh të ndalet “për të ndarë këtë fitore të madhe me ju në këtë betejë dhe për të festuar jetën që vazhdon.” Në një kohë kur rrjetet sociale shpesh ekspozojnë vetëm momente të kuruara, ky rrëfim erdhi i zhveshur nga çdo artific, i sinqertë dhe i fortë.
Videon e Antigonës e kishte publikuar edhe vetë Beatrix me mbishkrimin “Të dua Fort” dhe reagimet ishin të menjëhershme në drejtim të këngëtares dhe nënës së saj. Mijëra zemra virtuale, mesazhe mbështetjeje dhe komente nga figura publike e ndjekës të thjeshtë, të prekur nga kurajoja e saj. Një tingull gongu që u kthye në tingullin e një fitoreje njerëzore.
