“Sido që të vijë puna, martohu. Nëse merrni një grua të mirë do jeni të lumtur. Nëse merrni një të keqe, do të bëheni filozof”, ka thënë dikur Sokrati.
Sot, në ditën ndërkombëtare të bashkëshortëve, ne duam t’iu sjellim në vëmendje disa çifte që në mos janë shembuj për t’u ndjekur, janë ata që ne kemi parë t’i rezistojnë kohës, e ta tregojnë dashurinë hapur, me zemrën plot gjithmonë.
Janë krah për njëri-tjetrin, sfidat i ndajnë bashkë, familjen po e ndërtojnë bashkë, e shumë nga ju të paktën njërin prej tyre e keni të preferuarin tuaj. Ata i kemi zgjedhur të profesioneve dhe moshave të ndryshme, ku të dy partnerët ndajnë bashkë jo vetëm shtëpinë, por dhe punën.
Ardit dhe Anila Gjebrea, prej vitesh të martuar dhe ndër të tjera punojnë bashkë te “E diela shqiptare”, vetëm se Anila është më pak e dukshme sepse merret me gjithë organizmin në prapaskenë.
Miriam Canin dhe Alban Skënderajn as nuk i mbajmë mend pa njëri-tjetrin në krah. Të dy këngëtarë të njohur dhe një nga çiftet më të pëlqyer. Ndajnë bashkë skenën dhe çdo gjë tjetër.
Helena Kadare në fillimet e saj premtonte si shkrimtare, por edhe pse mbeti në hije nga Ismail Kadare, bashkëshorti i saj i njohur në gjithë botën, ka qenë dhe mbetet pika e tij e fortë.
Amarda Toska dhe Ermal Mamaqi, bashkë që në fillimet e karrierës së tyre në televizion. Dikur ndanin skenën bashkë, ajo si prezantuese dhe ai si aktor humori, ndërsa tani kanë bizneset e tyre që i menaxhojnë bashkë.
Orinda Huta dhe Turjan Hysko, një nga çiftet që i bëri bashkë puna në televizion. Rrallë i kemi parë të dy në një skenë, por së bashku kanë punuar pothuajse në çdo projekt. Ajo si prezantuese dhe ai si personi që punonte pas kuintave, kur nuk dilte në ekran. Të dy kanë kënduar dikur dhe pasionet që ndajnë i bëjnë bashkë po aq sa dashuria.
Dhimitër dhe Roza Anagnosti, regjisori më i madh shqiptar dhe gruaja e tij, aktorja e bukur e filmave shqiptarë.
Monika Kryemadhi dhe Ilir Meta, janë çifti më i spikatur i politikës. Kanë punuar bashkë në udhëheqjen e LSI-së.
Xhensila Myrtezaj dhe Bes Kallaku kanë një nga historitë më të veçanta të dashurisë. Të dy janë të mirë në fushat e tyre profesionale, e rrallë i kemi parë bashkë në një skenë, por kur bëhen ose do kërceni ose do qeshni me ta.
Armand Peza dhe Marçela Lati nisën të njihen fillimisht me emrin e biznesit të tyre “Geraldina Sposa”, pastaj për historinë më shumë se njëzetë vjeçare që e jetojnë mes sallonit të nuseve dhe shtëpisë.
