“Instagram”, është kthyer në një fushë të minuar me komente për shumë personazhe të njohur, por jo vetëm.
Së fundmi kemi parë sa shumë po gjykohen nënat e reja pas lindjes. Duke nisur nga Gigi Hadid që u shfaq pak ditë më parë duke u shëtitur të bijën dhe të gjithë u kapën me faktin që ajo është veshur me të shkurtra dhe ka inperfeksione.
Emily Ratajkowski, gjithashtu është gjykuar pafund për gjidhënien dhe publikimin e fotove të tilla me të djalin. Gjithashtu për barkun e rrafshtë që shfaqi në ‘Instagram’, a thua se fakti që e ka bekuar natyra është gabim. Sipas ligësisë online ky nuk është imazhi i një nëne të vërtetë.
Chiara Ferragni u gjykua për foton e parë të lindjes me vajzën në krah, sepse sipas disave kishte vënë grim. Por qe Fedez ai që e ngriti zërin dhe i tha të gjithëve që asnjë grua nuk duhet të ndihet keq për gjidhënien, apo gjëra të ngjashme.
Gjithë këto kritika online futen brenda një termi të vetëm: mom shaming. Personat e fshehur pas tastirës së telefonit dhe kompjuterit marrin të drejta që nuk u takojnë dhe kritikojnë për çdo gjë. Nëse një nënë ushqen me gji fëmijën në publik, konsdierohet e turpshme. Kur një nënë arrin të kthehet në formë shpejt pas lindjes, quhet egoiste. Nëse nuk mban veten quhesh e paaftë dhe e shëmtuar.
Për gjithçka ka kritika, madje disa prej tyre kanë arritur të bëjnë personazhe si Blake Lively të mbyllin profilet, ose të bllokojnë komentet.
A do ndalojnë ndonjëherë njerëzit duke dhënë këshilla? Duke ju treguar nënave si të rrisin fëmijët e tyre?
Kjo gjë duhet të ndalojë, thjesht duhet t’i lëmë nënat të jetojnë jetën siç duan, e t’i rrisin fëmijët pa marrë parasysh këshillat e liga online./revistawho.com
