Lexoni cilat gjëra duhet t’i shmangni e cilat shprehì duhet t’i ndryshoni, që të shfrytëzoni maksimumin e të gjitha produkteve kozmetike. Rezultati: fytyrë e shkëlqyer, e bukur dhe e kujdesur! Make up artist-ja e njohur Suela Çangu, ju ofron disa këshilla falas.
Shtresë e trashë pudre
Bartja e shtresës së trashë të pudrës së lëngshme do të bëjë që të dukeni më të moshuara. Prandaj, ndërrojeni pudrën e zakonshme ‘të rëndë’ me pudër të ‘lehtë’ dhe me shkëlqim ose me krem të tonerizuar për fytyrë me UV-faktor. Tepricën e pudrës largojeni me sfungjer për makijazh apo me facoletë të pastër. Kushtojuni kujdes të veçantë hapësirave me rrudha. Pikërisht aty mblidhet më së shumti pudra.
Nuancë shumë e çelët e pudrës së lëngshme
Nëse pudra është më e çelët se ngjyra natyrale e lëkurës, do t’jua theksojë linjat dhe rrudhat e fytyrës. Me plakjen duhet të zgjidhni edhe ngjyrë më të errët të pudrës. Një ose dy nuanca pudër më të errët se ngjyra e lëkurës, e pasuruar me shkëlqim, është zgjedhja juaj ideale për bazën për makijazh.
Shumë pudër pluhur
Shfrytëzojeni pudrën pluhur vetëm për të reduktuar shkëlqimin e hundës dhe mjekrës. Me shfrytëzimin e pudrës pluhur në pjesët e tjera të fytyrës, bëni që lëkura të duket e thatë dhe e lodhur.
Shfrytëzim joadekuat i rumenilës
Vënia e rumenilës vetëm në mollëza e orienton shikimin pikërisht në lëkurën e tharë. Prandaj, vendosni ngjyrë në gjithë kockën e faqeve, jo shumë afër hundës. Tërhiqni disa herë me furçë nga mesi i faqeve duke shkuar nga lart, duke pasur kujdes edhe gjatë zgjedhjes së ngjyrës. Ngjyra neutrale rozë e rumenilës i përshtatet secilit ton.
Buzëkuq i mbyllur dhe i dallueshëm
Mos i theksoni buzët e holla dhe të lodhura me buzëkuq të mbyllur, shumë të çelur apo me shkëlqim metalik. Në vend të tij, zgjidhni buzëkuq në ngjyrë neutrale rozë ose shkëlqim të tejdukshëm në shtresë të vogël, që mund të bëjë që buzët tuaja të duken të plota dhe me shkëlqim.
Laps për sy në kapakun e poshtëm
Lapsi për sy apo tushi, i shfrytëzuar në kapakun e poshtëm mund të tërheqë vëmendje në rrudhat rreth syve. Gjithashtu, vizatimi i kapakut të poshtëm vizualisht i zvogëlon sytë, prandaj vendosni laps vetëm në anën e jashtme të kapakut të sipërm.
Maskarë në kapakun e poshtëm
Edhe maskara në kapakun e poshtëm jep të njëjtin efekt si edhe lapsi apo tushi për sy. Rrathët e errët nën sy janë punë që duhet t’i fshihni me makijazh e jo t’i theksoni, prandaj, shfrytëzoni maskarë në një ose dy shtresa vetëm në qerpikët e kapakut të sipërm.
Pra, çelësi i dukjes së mirë fshihet në shfrytëzimin me masë të kozmetikës kualitative dekorative. Vënia e saj në pjesët adekuate të fytyrës, do fshehë mangësitë e do theksojë atributet.
