Beniada ka bërë një thirrje të fuqishme për një temë që shpeshherë diskutohet: Filtrat dhe imazhi i transformuar i bukurisë përmes tyre. Filtrat janë bërë pjesë e pandashme e fotove, por kështu thjesht po rrisim pasigurtë në pamjen tonë. Prandaj Beniada duke u nisur nga vetja, jep mesazhin se duhet ta ndryshojmë shoqërinë duke qenë sa më natyral.
“A mendoni se duhet ta duam veten siç jemi? A mendoni se duhet t’i themi stop filtrave? Unë mendoj se po, ka ardhur koha ta pranojmë veten siç jemi. Në këtë periudhë po shikoj një përdorim të tepruar të filtrave. Ne postojmë foto joreale, duke u përpjekur të dukemi si një imazh i plastifikuar, gojë gjigante dhe hundë si Chihuahu, lëkura e lëmuar dhe me shkëlqim si porcelani, për të tërhequr çfarë? Më shumë pëlqime dhe komente fake? Pjesa më e keqe është se kjo më pas na bën të shkojmë te kirurgu duke kërkuar fytyrën tonë si në filtrat e Instagramit. Unë kam qenë gjithmonë pro kirurgjisë, por për gjëra të nevojshme ose për mirëmbajtjen e lëkurës gjithmonë nën një specialist të mirë. Sot shikoj që përpiqemi të nxjerrin në pah një perfeksion që nuk ekziston. Unë për disa vite isha e pasigurt për veten time, pastaj fillova të punoja me veten, fillova të ushqehem shëndetshëm dhe fillova të stërvitem në palestër, pashë rezultatet dhe sot në moshën 30 pa përdorur asnjëherë mbushës dhe botox jam e kënaqur me fytyrën time. Do të doja t’u thosha adoleshentëve të sotëm se ju jeni të bukur kështu. Kujdesuni për shpirtin tuaj, bëni gjëra të bukura, jini të lumtur, mos shikoni se çfarë po bëjnë të tjerët dhe vazhdoni rrugën tuaj. Mundohemi të jemi versioni më i mirë i vetvetes. Mos dëgjoni atë që ju thonë shoqet dhe le të përpiqemi ta ndryshojmë këtë shoqëri duke u treguar sa më natyral në jetën reale dhe në rrjete sociale.”, shkruan Beniada.
