Artdashësit gjermanë të qytetit të Bocholt në Gjermani, në ditët e para të muajit shkurt njohën pak copëza Shqipërie falë pikturave të dy zonjave të talentuara Anila Hetoja dhe Edlira Harapi. Përmes një postimi në faqen e saj në ‘Facebook’, piktorja dhe interior design Anila Hetoja, me përvojë të gjatë pune dhe formimi në Kanada e më pas në Tiranë, kishte lajmëruar datën 4 shkurt, si data e çeljes së ekspozitës së saj të tretë në bashkëpunim me Edlira Harapin.
“Telling stories”, ekspozita e piktoreve shqiptare në qytetin Bocholt, do të mblidhte mjaft artdashës gjermanë të cilët vlerësuan punimet artistike të artisteve tona. Secila prej tyre solli pranë publikut tematika të ndryshme, ku më së shumti artistja Edlira Harapi ishte fokusuar tek ndjenja shpirtërore, ndërsa artistja Anila Hetoja u përfaqësua me punime të veshjeve tradicionale ku dominonin ngjyrat, teknika në punimin e tyre. Kjo ekpozitë u realizua nën vëmendjen e piktorit gjerman Marco Huning.
Anila thotë se ky eveniment nuk ishte rastësor. Të dyja artistet kishin kohë që mendonin të prezantonin veten tek artdashësit gjermanë.
“Me Edlirën kishim biseduar më herët mbi mundësinë e një hapje të ekspozitës në qytetin ku ajo banon, në Bocholt. Nuk ishte aspak e lehtë, por pasi aplikuam, një ndër piktorët më të njohur në vend, Marco Marco Büning, posedues i galerisë në Bocholt, na e bëri të mundur realizimin e këtij projekti”, shprehet Anila Hetoja. E emocionuar ende nga mikriptja e publikut gjerman, Anila tregon pak momente nga mbrëmja e së dielës ku u çel ekspozita me punimet e artisteve shqiptare.
“Gjithcka shkoi më së miri. Pikturat plot ngjyra, një gotë verë, muzika jazz në sfond dhe zëri i veçantë i Edlirës ishin në sinkron me njëra-tjetrën”, thotë Anila. Të dyja artistet folën shqip por secila spikati me individualitetin e tyre. Pikturat e Edlira Harapit të zhanrit konceptual, përcollën mesazhin e realitetit që na rrethon, ndërsa Anila Hetoja solli realitete të fokusuara tek format e qarta dhe tek loja me ngjyrat. Gjithsesi, punimet e Anila Hetosë kësaj here ishin drejtuar tek tradita shqiptare, ndërsa punimet e artistes Edlira Harapi ishin të fokususara tek femra e sjellë në një format konceptual.
Në total u ekspozuan 15 punime. Në këtë ekspozitë punimet ishin akrelike mbi kanavace.
Për Anila Hetonë, ky nuk është projekti i vetëm i menduar për këtë vit.
Ajo thotë se në planet e saj është ekspozita personale që do të çelë siparin në vjeshtë, ndërsa për piktoren Edlira Harapi në plan janë disa ekspozita në disa galeri të njohura gjermane./revistawho.com
