Së shpejti Shqipëria mund të mbyllë Tiktok dhe Snapchat.
Kryeministri Edi Rama ka reaguar pas ngjarjes tragjike të vrasjes së 14-vjeçarit Martin Cani nga një bashkëmoshatar pranë shkollës “Fan Noli” në Tiranë.
Në një deklaratë për mediat, Rama theksoi ndikimin negativ që rrjetet sociale kanë te fëmijët dhe adoleshentët, duke njoftuar se do të konsultohet me këshillat e prindërve në shkolla për një vendim lidhur me mbylljen e platformave si TikTok dhe Snapchat.
Sipas tij, nga hulumtimet e deritanishme, këto dy rrjete sociale përbëjnë burimin kryesore të çoroditjes dhe ndikimit negativ, përfshirë nxitjen e dhunës, bullizmin dhe raste tragjike si kjo e fundit.
Rama deklaroi se: “Gjithsecili prej nesh duhet të marrë përsipër më shumë në pjesën e vet për mbrojtjen e fëmijëve, duke nisur nga shtëpia, shkolla dhe deri te ekranet televizive, ku shumë figura publikë janë promovues të papërgjegjshëm të gjuhës së dhunës.
Dilema jonë si qeveri është nëse duhet të ecim edhe ne në drejtim të vendosjes së filtrave kur në të gjitha eksperiencat e deritanishme mësojmë se efektiviteti i tyre është i ulët ndërkohë që stimujt e dhunës në botën online vetëm rritet, apo të ndërmarrin masë drastike për mbylljen e plotë të TikTok dhe SnapChat në Shqipëri.”
Ai premtoi se qeveria do të ndërmarrë çdo hap të mundshëm për të mbrojtur fëmijët nga presioni i madh që rrjetet sociale ushtrojnë mbi ta dhe për të përmirësuar cilësinë e përmbajtjeve online.
