Një diskutim i zakonshëm mbi pushimet verore u kthye në debat të nxehtë në emisionin “Goca & Gra”, ku moderatorët shprehën qëndrime të ndryshme pas publikimit të një sondazhi nga Top Channel. Sipas sondazhit, rreth 36% e shqiptarëve nuk kanë mundësi të bëjnë pushime këtë verë, çka ndezi diskutimin për alternativat me buxhet të ulët.
Egla solli një këndvështrim optimist, duke theksuar se edhe me një buxhet të kufizuar ekzistojnë mundësi për të udhëtuar, si kampingu, që sipas saj ofron një mënyrë ndryshe dhe të përballueshme për të kaluar pushimet. “Shumë shqiptarë bëjnë atë fundjavën e famshme ose sajohen në tenda,” u shpreh ajo.
Por kjo ide u kundërshtua menjëherë nga Gerta, e cila me tone të ashpra tha: “Çadra është për të varfrit”, duke nënkuptuar se kampingu nuk është një zgjidhje dinjitoze për një familje. “Kampi është sikur kalon nga një gjendje jo e mirë në shtëpi e të shkosh në çadër të stresohesh më keq,” shtoi ajo, duke e cilësuar këtë mënyrë pushimi si të papërshtatshme.
Ndërkohë, Kleoniki solli një përvojë personale nga kampingu në Gjipe, duke theksuar se është një eksperiencë që të kënaq, sidomos për ata që kërkojnë aventurë. “Ka njerëz aventurierë, që kjo gjë i kënaq, nuk i lodh,” u shpreh ajo. Edhe Rudina mbështeti këtë ide, duke e quajtur kampingun një “super aventurë”.
Përplasja kulmoi kur Gerta deklaroi: “Tregon sa fakire je”, deklaratë që u prit me reagime të menjëhershme nga koleget e saj, të cilat mbrojtën idenë se kampingu është një zgjedhje personale dhe jo një tregues i statusit ekonomik.
Debati nxiti reagime të ndryshme në rrjetet sociale, ku një pjesë e publikut u ndje i fyer nga komentet përçmuese ndaj formave alternative të pushimeve, ndërsa të tjerë mbështetën idenë se pushimet duhet të ofrojnë rehat dhe luks, nëse do të quhen “të vërteta”.
Diskutimi pasqyron realitetin e përballjes së shumë shqiptarëve me vështirësi ekonomike, dhe sjell në vëmendje ndarjen e fortë mes perceptimeve për mënyrat “e duhura” për të pushuar.
