Një histori e rëndë dhe tronditëse vjen nga Spanja, ku 25-vjeçarja Noelia Castillo ka vendosur t’i japë fund jetës së saj përmes eutanazisë, një procedurë që do të kryhet këtë të enjte në qendrën e rehabilitimit ku ajo jeton.
E reja mbeti paraplegjike pas një tentative vetëvrasjeje në vitin 2022, e cila ndodhi pas një ngjarjeje traumatike: ajo ishte viktimë e një përdhunimi në grup po atë vit. Pas kësaj, ajo u hodh nga kati i pestë i ndërtesës ku ndodhej, duke pësuar dëmtime të rënda që e lanë të paralizuar.
Noelia kishte kaluar një fëmijëri të vështirë në një familje jofunksionale dhe për një kohë të gjatë jetoi në familje kujdestare, për shkak të problemeve me varësinë që kishin prindërit e saj. Në vitin 2022, ndërsa jetonte në një qendër shtetërore për gra vulnerabël, ajo përjetoi abuzimin që më pas ndikoi në gjendjen e saj të rënduar emocionale.
Që nga ajo kohë, ajo ka jetuar me dhimbje të vazhdueshme fizike dhe psikologjike. Për këtë arsye, kërkoi të ushtrojë të drejtën për eutanazi, e cila është e ligjshme në Spanjë që nga viti 2021. Në korrik 2024, një komision ekspertësh në Katalonjë miratoi kërkesën e saj dhe caktoi procedurën për në gusht, por ajo u pezullua pas kundërshtimit nga babai i saj.
Më pas, Noelia iu drejtua Gjykatës Kushtetuese Spanjolle dhe Gjykatës Evropiane të të Drejtave të Njeriut. Në mars 2025, ajo deklaroi se dëshironte t’i jepte fund jetës së saj me dinjitet. Në shkurt 2026, Gjykata Kushtetuese vendosi në favor të saj, duke konfirmuar se e drejta e saj për vetëvendosje nuk ishte shkelur.
Vetëm një ditë para procedurës, ajo dha një intervistë për emisionin “Ahora Sonsoles” në Antena 3, ku foli hapur për vendimin e saj. Ajo u shpreh se dëshironte të largohej nga kjo botë në mënyrë të qetë dhe dinjitoze, duke zgjedhur edhe mënyrën si do të paraqitej në momentin e fundit.
Noelia përshkroi dhimbjet e forta që kishte përjetuar prej vitesh, si dhe vështirësitë në jetën e përditshme, duke theksuar mungesën e dëshirës për të vazhduar jetën në këto kushte.
Ajo foli gjithashtu për marrëdhëniet e vështira familjare, sidomos me të atin, duke theksuar se vendimi i saj nuk është respektuar prej tij. Edhe pse nëna kishte kërkuar të ishte pranë në momentin e fundit, Noelia zgjodhi të largohej në vetmi, sipas dëshirës së saj.
