Sezoni i radhës i spektaklit të humorit ‘Portokalli’ do të nisë ditën e nesërme, por siç edhe mund të keni lexuar, këtë herë, Salsano Rrapi dhe Xhemi Shehu nuk do e drejtojnë të vetëm programin.
Ditë më parë gjatë provave, aktori i njohur dhe kolegia e tij u shfaqën në një video duke u shprehur se spektakli që drejtojnë do të ketë 2 prezantues më shumë. Ndërsa pasditen e djeshme, regjisori, Altin Basha ishte i ftuar në programin e pasdites në ‘Top Channel’, ku rrëfeu se ky lajm është i vërtetë, pa zbuluar më shumë detaje.
Burime për ‘RevistaWho.Com’, kanë zbuluar se dy prezantuesit e tjerë të ‘Portokalli’, nuk do jenë moderatorë të zakonshëm. Ata do të jenë dy aktorë të spektaklit që do vijnë të transformuar si dy personazhe të politikës shqiptare. Bëhet fjalë për Delinda Dishën, në rolin e Elisa Spiropalit dhe Rezart Veleshnjën në rolin e Erion Braçes. Me sa kuptohet kjo do të jetë një risi që kanë vendosur të sjellin në ekran drejtuesit e spektaklit dhe me siguri do të jetë shumë argëtuese. / revistawho.com
