Universiteti Mesdhetar i Shqipërisë do të mirëpresë këtë vit rreth 1600 studentë të rinj në 3 fakultetet e tij. Pas 12 vitesh eksperiencë në arsimin e lartë me 36 programe studimi bachelor dhe master në fazën e parë të aplikimeve, programet e studimit të Universitetit Mesdhetar të Shqipërisë janë përzgjedhur nga qindra të rinj që duan të investojnë në dije. Fakulteti i Shkencave Ekonomike mbetet më i kërkuari, por një rritje të kërkesës ka pasur edhe për dy fakultetet e tjera: Shkenca Juridike dhe Marrëdhënie Ndërkombëtare, si dhe Shkenca Psikologjike, Sociale dhe Politike. Programet profesionale dy vjeçare ku aplikohet pa mesatare, gjithashtu janë të kërkuara nga maturantët.
Në datat 2-15 shtator sekretaria mësimore do të presë regjistrimin përfundimtar të aplikantëve në këtë fazë. Një maturant merr statusin e studentit në Universitetin Mesdhetar të Shqipërisë vetëm pasi kryen procedurën e regjistrimit.
Universiteti Mesdhetar vjen këtë vit me 3 programe të reja studimi. Programi Bachelor për Komunikim dhe Marrëdhënie me Publikun, vjen me kurrikulat europiane sikurse dy masterat e rinj profesionalë për: “Hartim dhe Menaxhim Projektesh”, Master Profesional “Auditim i Brendshëm dhe Kontroll Financiar”.
Për herë të parë këtë vit Universiteti Mesdhetar hap programin Bachelor “Komunikim dhe Marrëdhënie me Publikun”. Universiteti Mesdhetar tashmë ofron gamën e plotë të programeve Bachelor dhe Master në 3 fakultetet e tij.
