Tiffany Trump, vajza e ish-presidentit amerikan Donald Trump, ka realizuar së fundmi një fotosesion të veçantë gjatë pritjes së ëmbël, nën drejtimin artistik të fotografit të njohur shqiptar, Fadil Berisha. Fotot u realizuan në New York, ku jeton dhe punon Berisha.
Disa prej këtyre imazheve janë publikuar në Instagram nga vetë fotografi, i cili ndau momente të veçanta nga bashkëpunimi me Tiffany-n, e cila dukej rrezatuese dhe elegante. Në postim, ai shkruan: “Së shpejti nëna e bukur”, duke e shoqëruar me fotografitë më të dalluara nga sesioni.
E veshur me një fustan rozë dhe duke përqafuar barkun e rrumbullakosur, Tiffany paraqitet në një atmosferë të ndjeshme dhe plot hijeshi, duke shfaqur anën e saj të përzemërt në këtë fazë të re të jetës.
Tiffany është në pritje të fëmijës së saj të parë me bashkëshortin Michael Boulos. Dyshja kurorëzuan dashurinë e tyre në një ceremoni madhështore në nëntor të vitit 2022 në Mar-a-Lago, rezidenca luksoze e familjes Trump në Florida.
Ky bashkëpunim e forcon edhe më shumë profilin ndërkombëtar të Fadil Berishës, i cili për vite me radhë ka qenë zgjedhja e preferuar e figurave të njohura si Hillary Clinton, Tyra Banks, Priyanka Chopra dhe shumë të tjerë. Me stilin e tij unik dhe artistik, Berisha është pozicionuar si një nga fotografët më të kërkuar në botën e modës dhe artit.
