I ballafaquar me një fakt jo të lehtë për t’u përtypur, ish-presidenti amerikan Barack Obama tha se e mbështet vendimin e vajzës për të hequr mbiemrin e tij, për hir të karrierës së saj në kinematografi.
Në fillim të këtij viti, Malia Obama, 26 vjeç, hoqi mbiemrin e saj në filmin debutues “The Heart”, të cilin e drejtoi vetë si regjisore.
“The Heart” u shfaq në Festivalin e Filmit Sundance 2024, ku emri i saj si regjisore në film u shfaq si “Malia Ann”, duke përdorur vetëm emrin e parë dhe të mesëm. Në një intervistë të re në podkastin “The Pivot”, ish-presidenti ndau mendimin e tij për këtë vendim të vajzës.
“Sfida më e madhe për ne është që vajzat tona të na lejojnë t’u japim çdo ndihmë,” tha Obama. “Dua të them, ato janë shumë të ndjeshme për këtë çështje dhe shumë kokëforta.”
Ish-presidenti shtoi se i kishte thënë të bijës se kjo nuk ndryshon ndonjë gjë të madhe, pasi njerëzit do ta dinë gjithsesi që ajo është vajza e ish-presidentit, pavarësisht përdorimit të një emri tjetër.
“Unë i thashë: ‘Ti e di se ata përsëri do ta dinë se kush je ti,” kujtoi Obama.
“Dhe ajo më tha: ‘E di çfarë? Dua që kur njerëzit ta shohin emrin tim për herë të parë, të mos më lidhin menjëherë me ty.’ Dhe unë e pranova këtë,” u shpreh ai.
