Pozicioni “C” i trupit me shpatullat mbrapa, barkun para, belin e harkuar në maksimum dhe vithe të nxjerra, është trendi më i fundit i qëndrimit apo pozicionit që shumë vajza marrin kur dalin në foto. E gjithë kjo, bëhet me një qëllim të vetëm, të tregohet fundshpina.
Por sa estetik është ky qëndrim? Çfarë pasojash ka mbi shtyllën tonë kurrizore?
Në ambientet e palestrave sheh shumë vajza që ushtrohen më tepër për formimin e fundshpinës. Shumë prej tyre i imponojnë shtyllës kurrizore qëndrimin në formë C – je, por pa e ditur se janë duke e deformuar atë.
Kjo posturë, brenda një kohe të shkurtër bën që këta persona të vuajnë nga e ashtuquajtura “Lordoza”, ose e thënë ndryshe sëmundja e “të shtyrit mbrapa”. Mjekët ortoped shpjegojnë se me një qëndrim të tillë, shpina në pjesën e fundit të saj merr një harkim të tepruar. Ky qëndrim shtonë presionin mbi shtyllën kurrizore dhe shkakton dhimbje.
Si shkaktohet Lordoza?
Lordoza mund të shfaqet që në fëmijëri pa ndonjë shkak të qartë, por mund të prek shtyllën kurrizore në çdo moshë. Arsye tjetër është postura apo presioni i tepruar që i jepet fundshpinës.
Obeziteti apo probleme të tjera që mund të shfaqen në vertebra janë gjithashtu shkaktarë të Lordozës.
Simptomat që jep Lordoza
Ky deformim i shtyllës kurrizore shkakton dhimbje të mesit, qafës, kokës, tërheqje muskulore apo mpirje.
Si trajtohet Lordoza?
Trajtimi i Lordozës varet nga niveli i harkut që ka marrë shtylla kurrizore. Ortopedët si pjesë të trajtimit sugjerojnë mjekim në rastet kur ka dhimbje, fizioterapi, joga, rënie nga pesha dhe në rastet kur situata është tepër e agravuar, ndërhyrje kirurgjikale.
Në rastet kur personi ruan për një periudhë të gjatë një staturë të tillë fizike të sforcuar dhe nuk trajtohet, do të ketë probleme me legenin, këmbët apo me organet e brendshme.
Personave që u është shfaqur ky problem në fëmijëri, duhet të ndjekin rekomandimet e mësipërme për t’u përmirësuar.
Kujdes, fundshpina nuk bëhet me zor, mos i ngarkoni shpinës pasojat e komplekseve tuaja
