Është ndarë nga jeta ditën e sotme ylli italian i baletit klasik, Carla Fracci. Fraçi u shua në moshën 84-vjeçare në Milano, qytetin ku edhe lindi. Ajo ishte një nga balerinat më të talentuara që ka pasur Italia, e konsideruar si mbretëreshë e skenave botërore. Ndarja nga jeta e Fraccit ka lënë pas shumë hidhërim edhe tek balerinët shqiptarë që kanë patur fatin ta takojnë si Kledi Kadiu, Ilir Shaqiri dhe Anbeta Toromani.
Kledi shkruan: “Të gjithë do të të kujtojmë për pafundësinë që ju dalloi në skenë. Aura juaj eterike, pasioni dhe përulësia juaj e madhe na kanë mësuar të tejkalojmë stereotipet e zakonshme të kërcimit. Më kujtohen sytë e tu që shkëlqenin kur më tregove për karrierën tënde, sepse kur ti flisje për kërcimin kishte gjithmonë emocion. Sot unë jam me dhimbjen e Beppe Menegatti dhe familjes tuaj. Premtoj se ne do të bëjmë më të mirën për t’ju përkujtuar ashtu siç e meritoni. Lamtumirë Carla”.
Iliri shkruan: “Nëna ime më thoshte: S’ka si ajo, ëndërronte të takohej me ty dhe unë isha me fat që të përqafova, frymëzim i njëmijë brezave. Lamtumirë Perëndesha e kërcimit”.
Ndërsa Anbeta ka postuar një foto prekëse ku shfaqet duke e përqafuar Fraccin e duke e lënë pa koment, pasi imazhi flet vetë.
