Këngëtari i njohur Ylli Limani ishte i ftuar në emisionin “Mirëmbrëma Yje” nga Arbana Osmani. Gjatë intervistës, ai u shoqërua nga prindërit e tij dhe ndau momente të ngrohta, duke folur për jetën e personale, fëmijërinë dhe sfidat që ka kaluar. Gjithashtu, ai zbuloi disa detaje interesante rreth projekteve të tij të reja muzikore.
Një nga projektet më të përfolura ishte bashkëpunimi i tij për kolonën zanore të filmit më të ri të regjisorit Eduart Grishaj, titulluar “Pashaporta”. Filmi trajton temën e emigrimit, statusin dhe përvojën e refugjatëve në mbarë botën dhe pritet të publikohet së shpejti.
Gjatë intervistës, Ylli dhe Arbana nuk ndanë shumë detaje rreth këtij projekti, por nuk munguan batutat. “Edi vërtet na ka lodhur ë? Më ka kërkuar të futem thellë në film. Por, në fakt, përtej shakave, mendoj se ky është një film i jashtëzakonshëm dhe mezi e pres,” u shpreh Ylli.
Filmi “Pashaporta” është tashmë në prodhim e sipër dhe ashtu si Ylli, edhe publiku shqiptar duket se mezi pret ta shohë.
