Drin Gashi, moderator dhe aktor i njohur në Kosovë, u bë i famshëm në Shqipëri si njeriu që ‘zbardhi’ enigmën e madhe, tekstin e këngës “Bonbon”. Ai ka zgjedhur të interpretojë në formën e një poezie këngët më hit të këtyre kohëve, nga “Po t’shoh përmas” tek Era Istrefi. Në këtë intervistë me revistawho.com Drini tregon se çfarë e shtyu për t’u marrë me këtë.
Çfarë të shtyu për t’u marrë me zbardhjen e teksteve të këngëve? Sa kohë të është dashur për ta bërë këtë gjë?
Faktikisht unë kam filluar t’i lexoj tekstet e këngëve hit dhe më interesonte se si mund të dukeshin ato në formën e një poezie. Më pas konkludova se shumica e njerëzve nuk i kuptonin tekstet e këngëve dhe mënyra se si unë zgjodha t’i interpretoj ato, ishte e duhura.
A ka patur reagime nga këngëtarët? Dhe nëse po cilat kanë qenë ato?
Reagime nga Ghetto Geasy nuk ka patur, ndërsa Era më ka shkruar dhe i ka pëlqyer shumë ajo çfarë unë kam bërë. Jam i bindur që dhe Ghetto e ka parë pavarësisht se nuk ka thënë gjë.
A do vazhdosh ta bësh këtë gjë edhe me këngë të tjera?
Do vazhdoj të bëj edhe disa këngë. Njërën prej tyre do ta publikoj brenda javës tjetër. Gjithashtu dhe kjo do të jetë një këngë hit e cila është dëgjuar shumë. Nuk do doja ta zbuloja se cila është, mirëpo ju ftoj të abonoheni në kanalin tim personal në “Youtube”-“MeDrinGashin” për të qenë sa më afër postimeve të fundit. / Isilda Bellaj
