Familja e aktores Chanel Maya Banks është në ankth të madh, pasi 36-vjeçarja është zhdukur në mënyrë misterioze në Los Angeles prej dy javësh. Chanel, e njohur për rolin e saj si Sawyer Bennett në serialin ‘Gossip Girl,’ u zhduk nga apartamenti i saj në Playa Vista, ku jetonte me bashkëshortin.
Nëna e saj, Judy Singh, dhe kushërira, Danielle-Tori Singh, udhëtuan në Los Angeles për ta kërkuar. Kur hynë në apartament, gjetën shumicën e sendeve personale të Chanel, përfshirë qenin dhe makinën, por celulari dhe laptopi i saj mungonin.
Shqetësimi i familjes është thelluar pasi bashkëshorti i Chanel refuzon të bashkëpunojë me policinë.
“Ai nuk është i gatshëm të ndihmojë policinë apo ne për ta gjetur atë,” tha kushërira e saj, duke shtuar se ai po heq posterat e vendosur për kërkimin e saj.
Familja po shqyrton gjithashtu shenjat e lëndimeve në fytyrën dhe trupin e bashkëshortit, të shfaqura më 10 nëntor. Pavarësisht këtyre dyshimeve, policia ka deklaruar se nuk ka prova të mjaftueshme për të konsideruar bashkëshortin si të dyshuar.
Për të vazhduar kërkimin, familja ka hapur një faqe GoFundMe për të mbledhur fonde për një hetues privat dhe për të mbuluar shpenzimet e qëndrimit në Los Angeles. Në një mesazh emocional, kushërira Danielle tha:
“Të duam shumë. Thjesht duam të dimë që je mirë dhe e sigurt.”
