Futbolli është parë gjithmonë si sporti i meshkujve, por këto vajza të reja e kanë vërtetuar se edhe femrat e bukura mund të jenë futbolliste dhe arbitre të mira. Katerina Gega, Xhensila Dodaj dhe Xhoana Malko, ditën e sotme ishin të ftuara në ‘Pasdite në Top Channel’ ku treguan për eksperiencat e tyre.
“Kam qenë pjesë e futbollit të femrave të Apolonisë, ndërsa më pas kam kaluar në skuadrën Tirana AS. Pak kohë më vonë e kam lënë futbollin e luajtur dhe i jam futur arbitrimit. Është e njëjta fushë, por me rroba të ndryshme. 5 vite në futboll, ndërsa së fundmi jam futur në akademinë e arbitrimit”, shprehet Katerina Gega.
Më tëj ka qenë Xhensila ajo që ka treguar edhe për vështirësitë që ka kaluar: “Edhe unë kam luajtur disa ndeshje, kam qenë futbolliste, por kërkonte shumë impenjim. Në fillim e kam pasur shumë të vështirë, por kam studiuar dhe jam stërvitur shumë. Kam dy vite tashmë që merrem me arbitrim”.
Vajza tjetër tregon që ka jetuar në Greqi dhe futbolli ka qenë një ëndërr, të cilën kur erdhi në Shqipëri e ktheu drejt arbitrimit. “Kam jetuar për shumë vite në Greqi. Më ka pëlqyer futbolli, por kam qenë e madhe në moshë dhe nuk mund të arrija nivelin e vajzave të tjera që merreshin me futboll, por kur jam rikthyer në Shqipëri fillova të merresha me arbitrim. Më pranuan në federatë dhe tashmë kam gati një vit që jam pjesë e arbitrimit”, u shpreh Xhoana në ‘Pasdite në Top Channel’, ka thënë ajo./revistawho.com
