Pas eksperiencës së hidhur me divorcin nga MacKenzie Scott, që i kushtoi rreth 35-40 miliardë dollarë, Jeff Bezos ka vendosur të mos lërë më asgjë në dorë të rastësisë.
Sipas burimeve të afërta me çiftin, Bezos dhe partnerja e tij e re, Lauren Sanchez, kanë firmosur një marrëveshje paramartesore jashtëzakonisht të detajuar, e cila është cilësuar nga ekspertët si “super e sigurt”.
Në këtë kontratë përfshihen të gjitha aspektet që mund të ndikojnë në një ndarje të mundshme, duke filluar nga pasuritë e luajtshme e të paluajtshme, deri te kujdestaria e fëmijëve dhe madje edhe skenarë të tillë si vdekja e parakohshme e Bezos apo një bonus i veçantë pas firmosjes së dokumentit.
Një nga klauzolat më të rëndësishme, sipas raportimeve, është ajo që përjashton çdo pasuri që Bezos ka krijuar para martesës nga ndarja në rast divorci. Duke marrë parasysh se pasuria e tij aktuale kap shifrën mbi 200 miliardë dollarë, kjo do të thotë se Sanchez ka pranuar të heqë dorë nga një shumë marramendëse.
Një tjetër sfidë për avokatët ishin ligjet e ndryshme shtetërore në SHBA që ndikojnë vlefshmërinë e kontratave të tilla. Në Kaliforni, për shembull, një marrëveshje e tillë do të kërkonte shpalljen e detajuar të çdo prone, gjë që “sigurisht asnjë manjat nuk do të donte ta bënte”.
Për këtë arsye, marrëveshja është hartuar sipas ligjeve të Floridës, aty ku ndodhen shumica e pronave të Bezos, përfshirë edhe vila me vlerë mbi 250 milionë dollarë në Miami.
Ligji i Floridës parashikon që në rast divorci, Lauren Sanchez do të ketë të drejtë për një mbështetje të paracaktuar, por jo për të ardhura apo investime të reja që Bezos do të gjenerojë gjatë martesës – një klauzolë kyçe që garanton sigurinë financiare të sipërmarrësit.
Në dokument është përfshirë edhe një klauzolë juridiksioni, që përcakton se vetëm ligji i Floridës do të zbatohet në rast divorci – edhe nëse procedurat nisin në ndonjë shtet apo vend tjetër. “Për shembull, një marrëveshje e vlefshme në Nju Jork mund të anulohet në Londër”, theksojnë burimet.
Edhe ceremonia madhështore në Venecia, duket se nuk ka pasur vlerë ligjore, pikërisht për të shmangur ndërlikimet me ligjet italiane, ku marrëveshjet paramartesore nuk njihen.
Jeff Bezos këtë herë ka zgjedhur të jetë i përgatitur në çdo detaj – dhe dokumenti i firmosur me Lauren Sanchez është dëshmi e kësaj.
