Modelja dhe ish-banorja e Big Brother VIP Albania, Beniada Nishani, ka ndarë në rrjete sociale një mesazh të qartë dhe të fuqishëm për respektin ndaj kufijve personalë, sidomos gjatë stinës së verës, kur situata të tilla shtohen.
Në një postim në Instagram, Beniada tregon për përvojat e saj si vajzë dhe si figurë publike, duke theksuar se shpesh përballet me burra që nuk dinë të ndalen, edhe kur iu thuhet me edukatë se nuk është e interesuar në bisedë apo kontakt.
“Shpesh, veçanërisht në verë, shoh gjithnjë e më shpesh burra me një qasje këmbëngulëse. Duke qenë një figurë publike, si vajzë dua të flas për diçka që nuk më duket normale. Privatësia e të gjithëve duhet të respektohet. Njerëzit mund të jenë kuriozë, të dashur, admirues, por nuk kanë të drejtë të pushtojnë hapësirën tënde, të këmbëngulin ose të injorojnë kufijtë e tu. Pëlqimi dhe interesi është shumë në rregull por gjithmonë me shumë edukatë.”
Ajo nënvizon se një refuzim i sjellshëm duhet të mjaftojë për t’i dhënë fund një ndërveprimi, dhe se çdo vazhdim pas kësaj është bezdisës – edhe nëse bëhet “me qëllime të mira”.
“Nëse thua me mirësjellje ‘nuk jam i interesuar të flas’, personi tjetër duhet të ndalet. Vazhdimi bëhet bezdisës edhe nëse bëhet ‘me qëllime të mira’. Nuk ka të drejtë të shqetësosh dikë ‘sepse është i famshëm’.”
Në vijim, Beniada prek edhe një temë të ndjeshme: kontaktin fizik pa leje, të cilin e konsideron jo vetëm të papërshtatshëm, por edhe të padurueshëm.
“Gjithmonë jam irrituar nga kontakti fizik. Veçanërisht nga të huajt që ndihen të lirë ta bëjnë… hum nuk e di për çfarë arsye…”
Ajo përmbyll mesazhin me një reflektim që vlen për të gjithë:
“Askund nuk është shkruar që një person i famshëm duhet të buzëqeshë gjithmonë, të jetë i disponueshëm, të pranojë qasje të papërshtatshme. Gjithmonë me zemër të hapur për njerëzit e mirë, por me kufij të qartë për ata që nuk dinë të respektojnë.”
