Në finalen e Eurovision 2025, Shqipëria u ngjit fuqishëm në skenë me performancën elektrizuese të Shkodrës Elektronike dhe këngën “Zjerm”, duke shënuar rezultatin më të lartë në histori sa i përket numrit të pikëve të grumbulluara: plot 218 gjithsej. Prej tyre, 173 erdhën nga publiku evropian, ndërsa vetëm 45 u dhanë nga juritë kombëtare.
Që në nisje të votimeve, u bë e qartë se juritë nuk po e favorizonin Shqipërinë. “Disa këngë që më shumë konsideroheshin si akte komedie, merrnin më tepër pikë,” theksohet në raportimin e Gazeta Express. Megjithatë, publiku ndërkombëtar e mbështeti fuqishëm performancën shqiptare, duke e ngritur vendin në pozicionin e tetë.
Franca rezultoi ndër mbështetësit më të mëdhenj të Shqipërisë, duke dhënë 12 pikë përmes jurisë dhe 10 nga publiku. “Shkodrës Elektronike” i shkuan gjithsej 22 pikë nga ky shtet.
Po ashtu, edhe Mali i Zi ndau të njëjtën sasi pikësh: “10 nga juria dhe 12 nga publiku”. Greqia i dhuroi Shqipërisë 14 pikë, Italia 13, ndërsa nga “Rest of the World”, përfshirë Kosovën, u siguruan edhe 10 pikë të tjera – duke e bërë Shqipërinë të dytën më të votuarën nga vendet jopjesëmarrëse.
Vlerësime të larta nga publiku u morën edhe nga Kroacia dhe Zvicra (nga 10 pikë secila), si dhe nga Gjermania me 8 pikë.
Ky ishte një sukses historik për Shqipërinë për nga pikët e mbledhura, ndonëse renditja më e lartë në Eurovision mbetet ajo e vitit 2012, kur Rona Nishliu u pozicionua në vendin e pestë. Megjithatë, në atë kohë formati ishte ndryshe, me më pak pikë në dispozicion.
Shqipëria dëshmoi se, edhe pa përkrahjen e jurive, mund të fitojë zemrat e publikut dhe të lartësohet në një garë kaq të madhe muzikore.
