Sara Hoxha, një nga figurat më të fuqishme në median shqiptare, ka rrëfyer në një intervistë të fundit për Newsbomb, historinë se si vajza e Dritan Hoxhës, themeluesit të Top Channel, nisi rrugëtimin e saj jo me ambicie, por me dhimbje dhe përgjegjësi.
“Nuk pati një moment të vetëm, një datë apo një ditë ku thashë ‘kjo është edhe ëndrra ime’”, shprehet ajo. “Fillimisht doja vetëm të ndihmoja familjen, të isha pranë Lorit, të ruaja me përkushtim atë që babai ynë kishte ndërtuar.”
Me kalimin e kohës, kjo përgjegjësi u kthye në pasion, dhe më pas në vizion. Sot, në moshën 29-vjeçare, Sara është producentja vizionare e Big Brother VIP Albania, aksionere e një prej perandorive më të mëdha mediatike në vend dhe një shtyllë e fortë për motrën e saj, CEO-n Lori Hoxha.
“Ëndrra e babait tim nuk ishte thjesht të ndërtonte një televizion, por të krijonte një mënyrë të re të të menduarit dhe të të treguarit në Shqipëri,” thotë Sara.
Pas përfundimit të edicionit të katërt të Big Brother VIP, ajo ndan krenarinë për një sezon që sipas saj nuk ishte vetëm spektakël, por edhe “një pasqyrë e realitetit shqiptar”.
“Ka pasur rrëfime ku është folur për përvoja të dhimbshme, për abuzime seksuale, për momente të jetës që kërkojnë shumë kurajo për t’u ndarë me publikun. Dhe është një privilegj, por edhe një përgjegjësi e madhe për mua si producente, të krijoj një hapësirë ku këto zëra dëgjohen pa paragjykim, me respekt dhe mbështetje”, thekson ajo.
Në këtë rrëfim nuk mungon as mirënjohja për partnerin e saj, Ledion Liço, me të cilin ndan jo vetëm jetën, por edhe skenën.
“Nuk ka dy si Ledioni — dhe këtë e them me gjithë bindje si dikush që ka kaluar 11 vjet pranë tij,” thotë Sara.
Por mbi gjithçka, ajo mbetet një bijë që ende ndien mungesën e babait të saj.
“Më mungon aq shumë, dhe boshllëku në zemrën time është aq i madh sa asgjë nuk do ta zëvëndësonte përqafimin e tij”, rrëfen me emocion.
Lutja e saj e përditshme? “Lutem për shëndetin e familjes time… që fëmijët e mi të njihen me dhimbjen sa më vonë.”
