Sot në botë ka hotele të reja, hotele sezonale, hotele familjare apo zinxhirë të mëdhenj hotelesh që janë supergjigandë. Por, është edhe Nishiyama Onsen Keiunkan, i cili në Librin e Rekordeve “Guinness” është i regjistruar si hoteli më i vjetër në botë, me 1315 vjet në shërbim të klientëve.
Ky hotel ndodhet në rajonin malor të Akaishit, në Japoni, dy orë nga Mali Fuji. Përveçse është hoteli më i vjetër, interesant është fakti që drejtohet nga e njëjta familje për 52 breza. Diçka vërtet unike në botën e biznesit.
Sipas ekspertëve të biznesit nga Universiteti i Kiotos, përkushtimi, respekti për traditën dhe përkujdesja për kalimin e trashëgimisë nga paraardhësit te brezat e ardhshëm, ndihmojnë për të kuptuar fenomenin “shinise”, të ashtuquajturat “institucione tradicionale” në Japoni.
Hoteli ka 37 dhoma dhe atraksioni kryesor i tij janë llixhat, të njohura si “onsen” në Japoni. Hoteli u rinovua në vitin 1997, për të ofruar më shumë rehati për mysafirët, por ruajti arkitekturën e saj të lashtë, duke ofruar një përvojë unike dhe tipike japoneze.
Vendndodhja e hotelit, i rrethuar nga male, ofron relaks absolut dhe një eksperiencë të veçantë. Është pikërisht lumi Haya, i cili i jep emrin qytetit, ai që rrjedh në qendër të qytetit dhe rrethon hotelin.
Ndërtesa 4-katëshe kombinon struktura moderne prej çeliku me ato tipike prej druri, për të ruajtur atmosferën e mikpritjes së qetë, aq të vlerësuar nga klientët dhe që e ka lejuar hotelin të qëndrojë hapur kaq gjatë.
Çmimi i një nate në njërën prej dhomave të tij është rreth 400 euro.
