Rihanna është sulmuar në rrjete sociale për shkak të një varëse që ka vendosur në një prej fotografive të saj të fundit. Në imazhin në fjalë, këngëtarja shfaqet duke pozuar topless, me bokse sateni ngjyrë livando që kombinojnë me bizhuteritë.
Mirëpo varësja që ka vendosur Rihanna mban simbolin e Ganeshës e njohur në Indi si “Zoti i Fillimeve dhe Heqjes së pengesave, prezantim i pasurisë dhe suksesit”.
Ndjekësit e kanë akuzuar këngëtaren se nuk po respekton fenë e tyre.
“A do flasim për faktin që Rihanna po mban varësen e Ganeshës dhe po ofendon sërish hinduizmin?”-shkruan një komentuese.
“Më fal Rihanna, por kjo është e gabuar. Ky idol adhurohet nga shumë njerëz dhe kjo është mosrespektim i besimit tonë. Nuk jam kundër varëses me Ganeshën, por të pozosh nudo me të. Jo zonjë e dashur!”
“Kam humbur çdo respekt për Rihannën. Si mund të vendosësh varësen me Ganeshën dhe të pozosh ashtu?”-janë disa nga komentet e tjera.
Kjo nuk është hera e parë që këngëtarja bën gabime të tilla. Pak muaj më parë ajo kërkoi falje publike që në koleksionin e ri të të brendshmeve të brandit të saj, modelet kërcyen nën ritmet e këngës “Doom”, e cila është e miksuar me disa vargje të shenjta islamike.
