Sabri Fejzullahu është një ndër ikonat e muzikës shqiptare. Me një karrierë që i kalon 5 dekada, artisti thotë në çdo dalje publike se muzika është jeta e tij. Së fundmi për “Mirage” ka folur për pjesëmarrjen në “Alb Fest” në Zvicër, organizim në të cilin ka qenë pjesëmarrës. Por artisti i madh ka vënë në dukje edhe një “trend” në rritje te këngëtarët e rinj, mbrojtja me truproja. Sipas tij nuk është aspak e nevojshme një gjë e tillë.
“Më dhemb diçka, shumë “bodyguard-ë” shqiptarët. Unë e di para tyre se çfarë është imazhi, I ndjek edhe ndryshimet e kohës, por shumë truprojë, shumë e sforcuar, kur i shoh ata njerëz me syze, ose kur një këngëtar/e e shoqërojnë 5 roje është e pamundur. Nuk është e nevojshme, ata shtyjnë publikun. Këndoni dhe jepni shpirtin se jeni të rinj. Artin e bëjnë më së miri, por shumë roje. Shpesh i pyes a janë në konflikt me dikë, ose familjarët e tyre,që duhet të shkojnë të këndojnë me truprojë. As Robert de Niro nuk ka aq truproja sa kanë këta“, ka thënë artisti.
