“Do jem jo-aktive online për javët në vazhdim. Siç e dini, do jem në Virxhinia ku do përballem në gjykatë me ish-bashkëshortin tim Johnny Depp”, kështu nis lajmërimi i fundit i Amber Heard në profilin e saj në Instagram.
Sot, më 11 prill, aktorja e njohur do takojë ish-bashkëshortin, i cili e ka hedhur në gjyq për shpifje. Pritet që gjyqi të transmetohet online në vazhdimësi të ditës së sotme.
“Johnny më ka paditur për një artikull që shkrova për Washington Post, ku tregova eksperiencën time me dhunën dhe abuzimin. Nuk e përmenda asnjëherë emrin e tij, por fola për ‘çmimin’ që grave u duhet të paguajnë kur flasin kundër burrave në fuqi. Unë vetë, ende po e paguaj çmimin, por shpresoj që me mbylljen e kësaj çështjeje të dy të ecim përpara”, vijon më tej aktorja.
Por Amber nuk la pa përmendur se për ish-bashkëshortin “ruan shumë dashuri dhe ndjen dhimbje që i duhet t’i kthehet të shkuarës së tyre bashkë para gjithë botës”.
Divorci i tyre i papritur, kur ishin një prej çifteve më të dashur të Hollywood, mori një kthesë të keqe kur në fillim të 2017-ës, u publikuan disa foto të Heard me përmbajtje dhune.
Ai e ka ngritur akuzën me një pretendim prej 50 milionë dollarësh dëmshpërblim, kundër ish-bashkëshortes, ankesa e së cilës për anulim u hodh poshtë nga një gjykatës i Virxhinias.
Kjo, sipas mediave do jetë përballja e fundit e çiftit që prej vitesh luftojnë publikisht me njëri-tjetrin dyerve të gjykatave./revistawho.com
