Në Itali, kureshtja ndaj telefonit të partnerit mund t’ju çojë pas hekurave. Pavarësisht arsyeve – dyshim për tradhti, mosmarrëveshje në çift apo procese divorci – ligji është i qartë: hyrja në mënyrë të paautorizuar në pajisjet apo llogaritë e partnerit konsiderohet vepër penale dhe dënohet me burg deri në 10 vite.
Ky është vendimi përfundimtar i Gjykatës së Kasacionit në Itali, e cila ka konfirmuar se veprime të tilla përbëjnë “hyrje të paautorizuar në një sistem informatik”.
Rasti konkret kishte të bënte me një burrë i cili, gjatë procesit të ndarjes nga bashkëshortja, kishte marrë pa leje mesazhe nga telefoni i saj. Ai u dënua fillimisht nga Gjykata e Apelit në Messina dhe e apeloi çështjen në Kasacion, por edhe aty humbi. Vendimi tashmë është përfundimtar.
Pra, kujdes: edhe nëse ndiheni të tradhtuar apo të mashtruar, ligji italian nuk jep asnjë justifikim për të hyrë në telefonin e dikujt tjetër pa pëlqimin e tyre. Ky veprim konsiderohet shkelje e rëndë penale, me pasoja të rënda ligjore.
