Reperi i njohur nga Kosova, Fero, ka ndarë një tjetër mesazh emocional për vajzën e tij, Ninën, me të cilën nuk është takuar prej afro një viti. Përmes një story-je në Instagram, artisti publikoi një portret të vizatuar të tij dhe vajzës së vogël, të shoqëruar me një mesazh prekës:
“Pothuajse një vit pa ty. Ndoshta e ke harruar se kush është babai yt ose ndoshta të ka marrë malli për mua. Mendimet e mia shkojnë thellë për ty. Na bënë padrejtësi vogëlushe.”
Në fund të postimit, Fero shtoi edhe hashtagun #shtetikorruptuar, duke lënë të kuptohet se vazhdon të ketë pengesa ligjore për të takuar të bijën, pavarësisht se në shtator të vitit të kaluar kishte njoftuar se kujdestaria i ishte caktuar për një vit.
Ky nuk është hera e parë që Fero shpreh publikisht mallin dhe shqetësimin për mungesën e kontaktit me vajzën. Në ditëlindjen e katërt të Ninës, ai kishte postuar një tjetër mesazh të ngarkuar emocionalisht:
“Nina, bebi im, sot ti mbush 4 vjet e unë s’mundem të jem afër teje. Tetë muaj më kanë ndarë padrejtësisht nga ti, pa mundur të të shoh, të të përqafoj, apo të të uroj si çdo baba. Çdo ditë pa ty është dhimbje dhe boshllëk.”
Reperi u bëri thirrje institucioneve të Kosovës që të marrin masa dhe të zbatojnë ligjin për të garantuar të drejtat e tij si prind:
“PS. Institucionet e Kosovës nuk mund të heshtin më. Është koha të veprojnë, të zbatojnë ligjin dhe të mbrojnë të drejtat tona. Çdo vonesë është një plagë për një baba dhe vajzën e tij. Mosveprimi juaj po shkakton dëme të parikuperueshme. Ju mbani përgjegjësi për këtë padrejtësi.”
Raportet mes Feros dhe nënës së vajzës, modeles Arbenita Ismajli, kanë qenë të tensionuara ndër vite. Çifti është përballur me akuza të ndërsjella, ndërsa Arbenita ka deklaruar më herët se ka qenë viktimë e dhunës në familje nga ana e reperit.
Pavarësisht ndarjes dhe problemeve ligjore, Fero vazhdon të jetë i zëshëm në kërkesën për të qenë pjesë e jetës së vajzës së tij.
